Prof. ass. dr. Petrit Duraj është prorektor për Zhvillim Akademik dhe Ngritje të Cilësisë në Universitetin “Fehmi Agani” në Gjakovë, si dhe profesor asistent në Fakultetin e Filologjisë.

Studimet bachelor në Gjuhë dhe Letërsi Shqipe i ka përfunduar në Universitetin e Prishtinës, ndërsa studimet master në Gjuhësi (Gjuhësi e Sotme) në Universitetin e Tiranës. Titullin Doktor i Shkencave Filologjike në fushën e Gjuhës dhe Letërsisë Shqipe e ka fituar në Universitetin e Evropës Juglindore. Gjithashtu, ka përfunduar studimet bachelor në Psikologji dhe është në përfundim të studimeve bachelor në Gjuhën Angleze.

Karrierën akademike e ka filluar në vitin 2014 në Universitetin “Fehmi Agani” në Gjakovë, ku fillimisht ka ushtruar detyrën e asistentit, ndërsa nga viti 2023 mban titullin Profesor Asistent. Gjatë angazhimit të tij universitar ka ligjëruar dhe ka zhvilluar ushtrime në lëndë të ndryshme të gjuhësisë, në nivelin bachelor e master. Ka qenë gjithashtu i angazhuar si ligjërues dhe asistent në Universitetin e Prizrenit.

Veprimtaria e tij shkencore përfshin artikuj të botuar në revista brenda dhe jashtë vendit të indeksuara në platforma prestigjioze, si dhe pjesëmarrje aktive në konferenca kombëtare dhe ndërkombëtare. Interesat e tij kërkimore përfshijnë sintaksën dhe morfologjinë e gjuhës shqipe, gjuhësinë krahasuese, drejtshkrimin, didaktikën e gjuhës, komunikimin dhe ndikimin e teknologjive bashkëkohore në gjuhësi.

Përveç veprimtarisë mësimore dhe kërkimore, prof. ass. dr. Petrit Duraj ka dhënë kontribut në proceset e sigurimit të cilësisë, akreditimit dhe zhvillimit institucional, duke qenë anëtar dhe drejtues i komisioneve të ndryshme universitare. Aktualisht, në cilësinë e prorektorit për Zhvillim Akademik dhe Ngritje të Cilësisë, udhëheq proceset që lidhen me zhvillimin e politikave akademike, sigurimin e cilësisë, akreditimin, zhvillimin e programeve të studimit dhe avancimin e standardeve të arsimit të lartë në Universitetin “Fehmi Agani” në Gjakovë.