Në kuadër të lëndës “Menaxhment dhe Ndërmarrësi” në programin Informatikë Inxhinierike, në Fakultetin e Shkencave Aplikative të Universitetit “Fehmi Agani” në Gjakovë u mbajt një ligjëratë e veçantë me ndërmarrësin e njohur Driton Hapçiu, i cili ndau me studentët përvojën e tij profesionale dhe rrugëtimin në fushën e ndërmarrësisë.

Gjatë ligjëratës, z. Hapçiu prezantoi sfidat dhe mundësitë që shoqërojnë zhvillimin e një karriere në biznes dhe teknologji, duke theksuar rëndësinë e inovacionit, iniciativës dhe lidershipit në suksesin profesional. Ai ofroi gjithashtu këshilla praktike për studentët, duke i inkurajuar ata që të zhvillojnë aftësi të qëndrueshme dhe të orientuara drejt tregut të punës.

Studentët patën mundësinë të parashtrojnë pyetje dhe të diskutojnë drejtpërdrejt mbi temat që lidhen me ndërmarrësinë, inovacionin dhe zhvillimin profesional, duke e bërë sesionin interaktiv dhe të dobishëm për të gjithë pjesëmarrësit.

Në fund të aktivitetit, ligjërata u vlerësua pozitivisht nga studentët, duke u konsideruar si një mundësi e vlefshme që lidh njohuritë akademike me përvojën praktike nga sektori i biznesit dhe teknologjisë.